ChatGPT : గూగుల్‌కు గట్టి పోటీ వచ్చేసింది! చాట్‌జీపీటీ కొత్త ఫీచర్‌

Google Open AI ChatGPT : ఇప్పటి వరకూ మనకు తెలియని విషయాల గురించి తెలుసుకోవాలింటే.. గూగుల్‌ శరణ్యం. అయితే.. ప్రస్తుతం ఆ పరిస్థితి మారుతోంది. దశాబ్దాల తరబడి ఇంటర్నెట్ రంగంలో సెర్చింజన్‌గా ఆధిపత్యం ప్రదర్శిస్తున్న గ్లోబల్ టెక్ దిగ్గజం గూగుల్‌కు గట్టి పోటీ ఎదురవుతోంది. అదీ ఒక స్టార్టప్ సంస్థ నుంచి పోటీ వస్తోంది. ఇప్పుడు టెక్నాలజీ రంగంలో ఆర్టిఫిషియల్ ఇంటెలిజెన్స్ (ఏఐ) చాట్ బోట్ కీలకంగా మారింది. మరో టెక్ దిగ్గజం మైక్రోసాఫ్ట్ వెన్ను దన్నుతో ఏఐ బేస్డ్ చాట్‌జీపీటీని ఓపెన్ ఏఐ (Open AI) అనే స్టార్టప్ సంస్థ రెండేళ్ల క్రితం వెలుగులోకి తీసుకొచ్చింది. వచ్చీ రావడంతోనే సంచలనాలు క్రియేట్ చేసింది ఓపెన్ ఏఐ.. చాట్‌జీపీటీ. ప్రతి అంశంపైనా అథంటిక్ సమాచారాన్ని అందిస్తూ గూగుల్‌కు పోటీగా నిలిచింది.

తాజాగా తాజాగా ఓపెన్‌ఏఐ చాట్‌జీపీటీ సెర్చ్‌ ఆప్షన్‌ను అందుబాటులోకి తీసుకొచ్చింది. గూగుల్‌తో పోటాపోటీ సమాచారం నెటిజన్లకు అందించేందుకు సెర్చింజన్ సామర్థ్యంతో కూడిన ఏఐ చాట్‌బోట్‌ను ఆవిష్కరిస్తోంది చాట్‌జీపీటీ జనరేటివ్. సంబంధిత వెబ్ సోర్సెస్‌ కూడిన లింకులతో శేరవేగంగా, సమయానుకూల సమాధానాలు ఇచ్చేలా ఓపెన్ ఏఐ చాట్‌జీపీటీ జనరేటివ్‌ను అప్ గ్రేడ్ చేస్తోంది. ఇంతకు ముందు అందుబాటులో ఉన్న సంప్రదాయ సెర్చింజన్ నుంచే వెబ్ సోర్సెస్ ఉపయోగించుకోనుంది ఓపెన్ ఏఐ.

దీని ప్రత్యేకతేంటో తెలుసుకుందాం..
గూగుల్‌లో ఏదైనా అంశం గురించి తెలుసుకోవాలంటే సెర్చ్‌లోకి వెళ్లి వెతుకుతారు. అదేమాదిరి ఇకపై చాట్‌జీపీటీలోనూ సెర్చ్‌ ఆప్షన్‌ను అందుబాటులోకి తీసుకొచ్చారు. గూగుల్‌ బ్రౌజర్‌లో ఎలాగైతే మనం సెర్చ్‌ చేసిన అంశాలకు సంబంధించి లేటెస్ట్‌ సమాచారం వస్తుందో అదేవిధంగా చాట్‌జీపీటీలోనూ డిస్‌ప్లే అవుతుంది. విభిన్న వెబ్‌సైట్‌లలోని సమాచారాన్ని క్రోడికరించి మనం వెతుకుతున్న అంశాలను మన ముందుంచుతుంది. అయితే ఈ ఆప్షన్‌ ఓపెన్‌ఏఐ వినియోగదారులందరికీ అందుబాటులో లేదు. చాట్‌జీపీటీ ప్లస్‌ కస్టమర్లు మాత్రమే దీన్ని వినియోగించేలా ఏ‍ర్పాటు చేశారు. కాగా.. ఈ చాట్‌జీపీటీ ప్లస్‌ కోసం ప్రత్యేకంగా డబ్బు చెల్లించి సబ్‌స్క్రైబ్‌ చేసుకోవాల్సి ఉంటుంది.

కొత్తగా పరిచయం చేసిన చాట్‌జీపీటీ సెర్చ్‌ వల్ల స్పోర్ట్స్‌ స్కోర్‌, స్టాక్‌ మార్కెట్‌ షేర్‌ ధరలు, వాతావరణ పరిస్థితులు, వివిధ స్టాక్స్ ధరలు, స్పోర్ట్స్ స్కోర్లు, బ్రేకింగ్ న్యూస్ వంటి రియల్‌టైమ్‌ సమాచారాన్ని తెలసుకోవచ్చు. దాంతోపాటు విభిన్న వెబ్‌సైట్‌ల్లోని ముఖ్యమైన సమాచారాన్ని క్రోడీకరించి సెర్చ్‌లో అడిగిన కమాండ్‌కు అనుగుణంగా డిస్‌ప్లే అవుతుంది. ఈ సేవలు పొందేందుకు వెయిటింగ్‌ లిస్ట్‌లో ఉన్న ఎంటర్‌ప్రైజ్‌, ఎడ్యుకేషన్‌ యూజర్లకు కొన్ని వారాల్లో దీన్ని అందుబాటులోకి తీసుకురాబోతున్నట్లు కంపెనీ తెలిపింది. రానున్న కొన్ని నెలల్లో అందరికీ ఈ సేవలు అందుబాటులో ఉండేలా చర్యలు చేపడుతామని పేర్కొంది.

చాట్‌జీపీటీ ప్లస్, చాట్‌జీపీటీ టీమ్ యూజర్లు, సెర్చ్ జీపీటీ వెయిట్ లిస్ట్ యూజర్లకు ఈ సౌకర్యం తక్షణం అందుబాటులోకి తెస్తున్నామని పేర్కొంది. కొన్ని వారాల్లో ఎంటర్ ప్రైజెస్, ఎడ్యుకేషనల్ యూజర్లకు అందుబాటులోకి వస్తున్న ఈ సౌకర్యం.. చాట్‌జీపీటీని ఫ్రీగా వాడుకునే యూజర్లకు చేరువ చేయడానికి కొన్ని నెలల టైం పడుతుందని ఓపెన్ ఏఐ పేర్కొంది. దీంతో రానున్న రోజుల్లో జనరేటివ్‌ ఏఐ రంగంలో విప్లవాత్మక మార్పులు రాబోతున్నట్లు నిపుణులు అంచనా వేస్తున్నారు.